La lavandara con la barela in riva al fosso

Pubblicato il 10 febbraio 2021 – Aggiornato il 23/10/2024

LA FONTANA E LE LAVANDARE

Eco! La fonte la se prepara, missiando l’acqua

E osando contenta: “Done!!! L’è luni!!!

Dai che ve speto par lavar le robe!!!”.

E lore, co’ le barele soto el brasso

E le secie porté, a fadiga, par man,

le se imbarca de bona lena, a la fonte…

E le ciacola forte, starnassando,

come un s-ciapo de anare in sboresso,

molè in giro par la corte…

E la baruffa!!! Par ciaparse el posto meo,

sbotassandose spesso e volentieri,

par le strasse mal lavé e mal resenté…

E le sbate!!! Strucando ste pore robe,

con man sapienti e generose,

de n’arte che sà da neto…

Ma l’acqua ciara, la se grata su par le rive,

come un butin che se sfregola i oci,

sveandose da un bel sogno ormai svanìo…

E pì no la se sente cular

Da le tante beghe,

ciacole e canson de lavandare…

Che mai stufe, le missia co’ le man

el sùdor impastà col saòn,

con gran cura, sensa mai fermarse…

E pi no la sente doparar la so acqua vergine,

par lavar quatro strasse infagoté e sporche

de fadiga e de tante ore passé in meso ai campi…

Ogni sbatùa, su la barela,

l’è come na sbrinsola de tempo,

che smorfioseta la se olta indrìo.

E l’acqua vergine, de la fonte,

in sboresso, la speta de poder zugar,

come n’a olta, co’ le lavandare…

Ormai strache… Sfinie… Bagné,

fin’ sima al col e coi diei slisi

e tuti roti, a forsa de fregar.

Ma le barele smarse, consumé da l’acqua,

ormai j è sté taché a un ciodo,

o brusé nel fogo, parché pì no le serve…

E la fontana, impasiente,

ancora la le speta… La le ciama…

Ma le lavandare… No le risponde pì.

(Poesia di Nadia Scudellari – Cazzano di Tramigna – Verona)

Lavandare in Campofiore a Verona – Cartolina

Lavandare in quella che ora è via Terrà a Verona -Cartolina

Lavandara al Tondello a Montorio – Archivio Bruno Toffaletti

Lavandara ai Camilioni – Foto da archivio Lucillo Bongiovanni

Lavandara in via Oleandri – Foto da archivio Guardini

Lavandara sulla Murara nella Mandria – Foto da archivio Massimo Bazzoni

Carro di Carnevale “La Barela” – Foto da archivio Renato Peroni